مصحف فاطمه.. لو هذا انجيل
'>#e9eaed]
مصحف فاطمه.. لوهذا انجيل
كاصد كربله..اويقره التراتيل
دمع يعكوب بيه.. يوسف وَن عليه
مصحف فاطمه ..لوهذا انجيل
*******
آهاتي… مثل آه الحمامه للعش اتناطر
جمراتي.. تسعربالكلب من كالوا امسافر
دمعاتي… مثل دمعات أم مكسورة الخاطر
وناتي.. أون ون الثكالى والكلب شاجر
يجرحني السفر… والمدمع أينوح
وآنه املوعه.. من هاي الجروح
من هاي المسيه.. يوسف ون عليه
مصحف فاطمه.. لوهذا انجيل
*******
لرسومك…اشوفن وجهك ابسورة سفر ياسين
لنجومك..مزامير النبوه اترتل اسم احسين
لنسومك.. هوه اعذيبي اوشمال اوتدعي للطيبين
إليومك..اناجيل اوصحف داود بالماشين
يانوح ابهجركم..مدمعه ايطيح
دمعات العليله..اتسابك الريح
هلي كلتوا خطيه… يوسف وَن عليه
مصحف فاطمه.. لوهذا انجيل
******
يازينب..ألم بإهدومي هاي اخذوني وياكم
اتكرب..رغم مرضي يعمه ابروحي ارعاكم
اتعذب..اذا روحتوا يعمه اهمومي تنعاكم
يتوثب.. عليه الموت وإنه اتحسر اتناكم
محامل للوحي.. والحادي الحسين
عباس العميد..ايسايره البين
ارفع دوم اديه… يوسف وَن عليه
مصحف فاطمه. لوهذا انجيل
********
حسراتي… جرحني حسين واسكت تنذبح روحي
عَبراتي…آيه امن الحزن تقراهه بجروحي
صفناتي..قلم ضلعي كتبهه انزرعت ابلوحي
جلماتي..يابويه عزيزه الجلمه يم نوحي
ابياجلمه اودعك.. ياهوه الهاب
محتاره ارجعك.. والكلب ذاب
عليك امي الزجيه..يوسف ون عليه
مصحف فاطمه.. لوهذا انجيل
******
ودعني..شفت عيسى المسيح ابشخصه ودعني
سَمَعني...انجيل اووحي بآياته سمعني
رجعني..بكيت أسعه ابخطوته اوكام رجعني
صدّعني..كال ابنيتي ردّي ابصوته رجعني
بعد شسأل عليهم.. والضعن راح
كلبي من الصدر..إتمحّل اوطاح
رحل للغاضريه...يوسف وَن عليه
مصحف فاطمه.. لوهذا انجيل
*******
خلوني.. شفت آيات سارت وي ابوفاضل
منعوني..انه ابكلبي سيوف الفركه اتقاتل
بعيوني..عينه اتصدعليه والدمع هامل
لضعوني.. اسمعت اخبار اهلي اتشيب الجاهل
أقره الفاتحه..للوالد حسين
السبع المثاني..لأم إلـــْبنين
هلي ابهاي المسيه…يوسف وَن عليه
مصحف فاطمه.. لوهذا انجيل
**********
الحمدلله رب العالمين
ديوان
دموع الهاشميات
الجزء الثالث
شبكة الوادي الثقافي - السيد هادي الموسوي الناصري - الجمعة 14 / 08 / 2015 - 02:03 مساءً
زيارات 472 تعليقات 0
شارك المحتوى عبر مواقع التواصل الإجتماعي