دمعة نصر
**
صدك زينب هجمت اعليها الخيول....صدك زينب سلبوها من الخدر
وين عنها الاكبر اوين الكفيل...........اوين عنها حسين ابن فارس بدر
هاي هيبة حيدره رمز الاباء..........اشلون خلاها الكفيل ويه الكفر
هاي صبر حسين شايلته الطفوف....هاي بنت النزل اعليه الذكر
ينسلب منها الخدر لا مستحيل.......من حجاب القدره جللها بستر
وما اصدك حايره بطف كربلاء....ولا بكت مذهوله وتدير الفكر
قلعه صارت سور لايتام الحسين....ويم صبرها انذهل محتار الصبر
نجوم شافتها وبدر يهوه ويطيح....وشافت حسين انذبح بيد الشمر
وبصبرها نادت الباري بخشوع....وشجرة الايمان لا ماتنكسر
يا الهي هذه قربان الخليل..........بالطفوف الموعد وحل النذر
اتقبل القربان يارب السماء....لجل دين المصطفى مايندثر
شمس زينب جلت كل زيف الظلام....هاي اخت حسين لاءه بكل عصر
لسان زينب لو بدت تخطب خطاب....جنه سيف المرتضى يشطر شطر
اعلام للثوره غدت في كل مكان.....ماتهاب الطاغي من تمشي بيسر
مو بيديها دموعها لمن تطيح....هذه دم جروحها اعله الخد يثر
ولوله دمعة زينب ودم الحسين....جان ظلت حندس وما طر فجر
هاي دمعه هدمت عرش الطغاة....وهاي دمعه اسست اكبر فكر
هاي دمعه بينت معنى الوفاء......ودمعة المظلوم عالطالم جمر
وهاي دمعه شيدت دين الرسول....وهاي دمعه ودم بنت صرح النصر
سيف هاي الدمعه ثوره اعله الطغاة....تحطم عروش الظلاله بكل عصر
خادم اهل البيت
ابو احسان الهلالي