يعباس... الليله السابعه من المحرم
****
يعباس .....ياهيبتي وعنواني
يعباس.....سوط الشمر آذاني
تحت جنح الليل اجيتك يلولي
وانه اعرفك ماترد مطلب الي
**** ***
اعثر بهمي ودمع عيني يسيل
وعفت الايتام وحرم ويه العليل
زينب آنه اشلون تقبل يالجفيل
بيه مووصاك حماي الدخيــل
يعباس.....جيت اشتكيلك حالي
يعباس ....حال الحرم واطفالي
كوم خويه وياي ياضنــوة علي
وانه اعرفك ماتـرد مطلب الي
**** *****
خويــه كــوم وياي لالاتعتــــذر
خويه كوم وطفي ناري التستعر
حسين ياعباس حز نحره الشمر
خويه ماظل خدر سلبوه الخـدر
يعباس..... واتكبعت باحـزاني
يعباس......سلب الخدر سلاني
كوم شوف متوني ياغيرة هلي
وانه اعرفك ماترد مطلب الي
**
شعجــب ماشميت دخــان الخيـم
علينه شبت نارها يابو الشيم
بلوعــه خليت اليتامـه والحـــرم
كوم خويه وياي موحيلي انهـدم
يعباس...... دهاك اخذ جفيني
يعباس... اخذ النظر من عيني
جيت شجايــــــــه دكلي اتدللي
وانه اعرفك ماترد مطلب الي
**
وين عباسج يكلي خـــل يجيج
لاتحشمينـــه بعد مايعتنيـــــج
عله عناده اليوم اجتفهن ايديج
وخلي هاي الناس تتفرج عليج
يعباس.... حجيه بسهم صاباني
يعباس......واتشمتت عدواني
روحي بالنيران ظلت تصطلي
وانه اعرفك ماترد مطلب الي
**
راح اردن وحدي وكلبي انشلع
الامل من عباس ياسكنه انكطع
بلايه جفين وعله الشاطي وكع
غركيته بدمعي عمه وما فزع
يعباس.....جاوينه وعدك وينه
يعباس.....ترضه الشمر حادينه
ها يبو الغيــــــره يعزي وكافلي
وانه اعرفك ماترد مطلب الي
**
صوت ناداها بالم من منحره
والعتب اذاني يابت حيدره
منج ومن سكنه ارجو المعذره
عليه المحتم حكم حكمه وجره
يعباس ....ادري بعتابي اذيتك
يعباس... يابو الوفه عذريتك
عالرمح راسك يباري المحملي
وانه اعرفك ماترد مطلب الي
**
خادم اهل البيت
ابو احسان الهلالي