صوت الانصار
**
صوت الانصار اعتله بطف كربله
كل معاني الحكمه بيه امسجله
فدوه كلنه نروح لحسين وهله
ثابتين اعله العهد تلكانه
**
عالدروع كلوب لبستها الزلم
ماتهاب الموت والكل مبتسم
احنه شفنه وياك تحقيق الحلم
والشهاده لكل فرد عنوانه
**
حاشه لنه انعوفك بيوم الشدد
بيك وصانه النبي والكل شهد
نعاهدك يحسين وبهذه العهد
باجر انوقعه الك بدمانه
**
احنه درعك بالوغه يبن البتول
خلنه سيف بيمنتك لمن نصول
كبلك الحومه نطبها وشتكول
خل نزلزلها اعله بن مرجانه
**
اتغازلوّا ويه المنايه بكل فخر
لازم انقر عين ابن سيد البشر
وين من سيوفنه وين المفر
والغضب بينه انفجر بركانه
**
جالصواعق نزلوّا بسوح الحرب
بالركاب اسيوفهم تحطب حطب
نار شبوها وغدت تلهب لهب
وجيش اميه اتشاردت فرسانه
**
دافعو عن ابو اليمه بكل ثبات
ضحوّا الارواح وهبوها الحياة
نالوّا اعله مرتبه بالتضحيات
من اجل دين النبي واركانه
**
خادم اهل البيت
ابو احسان الهلالي