لاتظن عابر سبيل.. هذا مسلم
والنسب إبنُ عقيل.. هذا مسلم
ظلت الكوفه تموج..كام بالعسكر يفوج
هذا مسلم.. هذا مسلم
*************
هاجت الكوفه بأهلهه
كالوا  اشعنده السفير
صاح بايعتونه انتــــم
والقسم كلش جبير
ماإلي ثــــار واطالب
والوضع صاير خطير
كسّر اخشوم العلوج.. كام بالعسكر يفوج
فارس ابهيبة يميل.. هذا مسلم
والنسب ابنُ عقيل.. هذا مسلم
هذا مسلم.. هذا مسلم
***********
حمل صكار العساكر
سيفه يقبض بالنفس
خمدت الانفاس يمــه
كلهه مخلوسه خلس
أخــــو زينب بالمهابه
جـــنه متعني العرس
نحر جم نحرير منهم
فارس انطاهم درس
اسد عالوادم يهوج.. كام بالعسكر يفوج
طفه نيران الغليل.. هذا مسلم
والنسب ابنُ عقيل… هذا مسلم
هذا مسلم.. هذا مسلم
**********
زلزل الكوفه بأهلهه
والوجه عنده عبــَـس
صاح هلا من منازل
والجمع منــــه خنَس
يمشي والسيف ابقبضته
غيم بعيونه انحبس
كال لأجل الدين دمي
سيفه بالملعب ردَس
بالظهر طوعه تلوج.. كام بالعسكر يفوج
والامل كلش قليل.. هذا مسلم
والنسب ابنُ عقيل.. هذا مسلم
هذا مسلم… هذا مسلم
*************
كبّر السيف ابيمينه
حصد باركاب الحقد
يبرج السيف ابصواعق
عالعساكر مـــن يهــد
شرر يتجادح جبينه
من يكُر لا.. مــايرد
يحمل أهموم السفاره
وحده بيمن يستند
والجحافل دم تروج.. كام بالعسكر يفوج
حمله بالكوفه ثجيل.. هذا مسلم
والنسب ابنُ عقيل.. هذا مسلم
هذا مسلم.. هذا مسلم
********
صولة العطشان تكتل
والعطش بعيونه صاح
سورج او ضهضب عليهم
صرخت مثل الرماح
كبّر إبالله واكبر
سجد بجفوفه السلاح
صوفرت بالخوف منه
رجّف اكلوب الصفاح
والدمع بعيونه روج… كام بالعسكر يفوج
سلم او يدري قتيل.. هذا مسلم
والنسب ابنُ عقيل
هذا مسلم… هذا مسلم
*************
الحمدلله رب العالمين
ديوان
دموع الهاشميات
الجزء الثاني