خويه حسين ...صبرك وين....جفنك لا يهل دمعه
**
يبن امي القدر مكتوب .... علينه والقلم خطه
سجيتنه الصبر يحسين.... ولازم بيه نتغطه
سليل العار ابن سفيان.... تفايض بالظلم شطه
مبغض للولي الكرار..... ولال النبي ورهطه
الغدر معروف...بيه موصوف.... ماكر واضح ابطبعه
**
شيصبرني يبو محمد... ياتجوه والي ومسند
تلوج اكبالي اشوفنك... وشوفن جبدك اتمرد
يابحر الكرم والزود.... يمن للوافد المكصد
من تون تهدلي الحيل....واشوفك شاحب امدد
تون مجروح...يروح الروح...تون وي ونك السبعه
**
ياخويه الطشت شيله....ابعده ولايظل يمي
ماريدن يبو السجاد....تصد اتشوفه بت امي
يخويه تنفجع زينب...لون شافن طشت دمي
خناجر جن احس يحسين...تمرعد كامت بجسمي
الالم سلني ....ارتفع وني ...وحك ضلع امك البضعه
**
حانت ساعة التوديع... وجفني بيدك اتغمضه
واسلمك عهدي ياخويه....واعرف عهدي اتحفظه
واريدن عزمك اتشده...وامرك للعلي اتفوضه
اسلم امري للمعبود...خاضع لامره ولفرضه
خمد ونه...غمض جفنه....من الال انطفت شمعه
**
حسين الغسله ولفه.... بجفن وبنعشه من خلاه
وهاشم شيعت نعشه...بونه وحسره والويلاه
ابقيع الغرقد ايدفنوه....ابن امه باللحد واراه
ونصبوا ماتم المسموم....الهواشم بالحزن تنعاه
هالمفكود....بحر الجود....وحسين انحنه ضلعه
**
يوم حسين اشد واصعب ....من يومك يبو محمد
محد شيعه وشاله....ظل اعله الثره امدد
وداست فوك صدره الخيل...ونار خيامه تتوكد
وزينب والحرم وايتام....تنادي وماكو الها احد
العرش مفجوع ... يهل دموع ... كبر بالسمه اتسمعه
**
هالليله بحزن وبنوح....بعزانه انعزي مهدينه
بدمع نتوسل المعبود ... يعجل طلعته علينه
لاحك لاعدل موجود... من هل وضع ملينه
ننزف والجروح اغماك... بس جفه اليداوينه
لمحي الدين... منتظرين...اله صوت الاسى انرفعه
**
خادم اهل البيت
ابو احسان الهلالي