لا تشيل النعش خلّه لاتشيل
بي ضلع مكسور حمّاي الدخيل
خافن إتأذيهه…؟..من تشيّع بيهه
لا تشيل النعش خلّه لاتشيل
*******
بالعرُف عدنه الجنازه من نزتهه
إنحطهه وسط الدارعالقبله نمدهه
انكوم نرفعهه عله العتبه نردهه
اشلون باب الدار بعيونك تصدهه
ياأمير الفقره إنطينه الجواب
باب خيبر شلته وإيْبَجّيك باب
هم تصد إعليهه…؟…من تشيّع بيهه
لاتشيل النعش خلّه لاتشيل
******
گلّي ياعاشك مشه إيشيّع حبيبه
إيصير عاشور إليحب تسمع نحيبه
فرگة الخلاّن كل راسك تشيبه
وأنشد ابجرح الهجر منهوا اليطيبه
بالنعش دمعات لـو ونّـة حبيب
لوتنادي الزهره ماظنك تجيب
تكدر اتحاجيهه…؟..من تشيّع بيهه
لاتشيل النعش خلّه لاتشيل
******
باب دارك مشتعل عينك تشوفه
وإنت ماتحمل هظم خصمك تعوفه
وجه بنت المصطفى السطره تطوفه
جرح زينب عالحصل تكدر تروفه
وينك الحكني الطفل كامت تصيح
آخ...صاحت ياعلي اوردّت تطيح
بالدمه اتخليهه…؟…من تشيّع بيهه
لاتشيل النعش خلّه. لاتشيل
******
هالجنازه من تسير انته وراهه
ليش تمشي إبظلمه وإتطفي ظواهه
وليش هاي الليله مو كمره سماهه
يعني غابت فاطمه اوربنه اصطفاهه
صاحوا إعليهه اليتامه الزهره وين
إوداعة الله إيصيح يايُمّه الحُسين
زينب إتناديهه…؟...من تشيّع بيهه
لاتشيل النعش خلّه لاتشيل
*******
كل جنازه اخوان تحضر يم محلهه
وادم إتجهز الجفن واتواسي اهلهه
فاطمه ماتت يتيمه أومحّد إلهه
إبجفه ابوالغيره علي هوّه الحملهه
صدك هد حيلك علي ضلع البتول
من تِوَسِد بالتراب أم الرسول
نفسك إتواريهه…؟...من تشيّع بيهه
لاتشيل النعش خلّه لاتشيل
*****
زينب(إبلا أم)بقت هاي المسيه
وحشه دار العايله ماهي الزجيه
من زغرهه إتخاوت أوياهه المنيه
من طفوف امهه الطفوف الغاضريه
نعلك اشموع الحزن ويََّ العزاء
إلليله نذكر فاطمه إبّيت الدُعاء
بالدمع واسيهه…؟…من تشيّع بيهه
لاتشيل النعش خلّه لاتشيل
*******
الحمدلله رب العالمين
ديوان
دموع الهاشميات
الجزء الثاني