**   **
       للطف رجعنه ..... ماشفنه اهلنه
ردينه من سبي الشام... بضعن الحرم والايتام
             للطف رجعنه
                  **
بدمعتها نادت زينب المحزونه
چنت بامل ولياني يتلگونه
وصوت اليتامه اشعجب ميسمعونه
تغير شكلنه وماظن  ايعرفونه
        الهم كتلنه .... وغير وضعنه
جرح اليسر مايلتام... جبت الحرم والايتام
              للطف رجعنه
                   **
تومي بيديها والدمع عالخد سال
ردينه بهموم وهضم ماينشال
اتمنه ولياني تشاهد هالحال
باللحد ناموا مابگت كل امال
      صاحت يعمه.... وين ابو اليمه
بالگلب تسعر الام.... جبت الحرم والايتام
             للطف رجعنه
                  **
عمه على وين ادفنت عودك وين
وانصاره واولاده واخوته الطيبين
جاوبها ابو الباقر يهل دمع العين
ريحـــة اخيچ عمـــــه ماتشتمين
         شبگته بهمه .... وگامت تشمه
ولشوفتك گلبي احتام .... جبت الحرم والايتام
               للطف رجعنه
              **     **
شاب الگلب ياخويه لمن عفتك
متني ورم بالسوط من فارگتك
مچتوفه اديه وعالهزل ودعتك
تمنيت تگعد تنظر لحال اختك
        شوف الهديه ... راسك بديه
وي جسمك الليله اينام...جبت الحرم والايتام
                للطف رجعنه
                     **
من گبره سمعت صوت ويناشدها
يختي العزيزه رقيه شو فاگدها
ما الها صوت ويه اليتامه اشعدها
تگله اعله راسك موتها امواعدها
  من شبگت الراس.... گطعتها الانفاس
فجعونه بيها الظلام .... جبت الحرم والايتام
             للطف رجعنه
                  **
ونت وگامت زينب ادگ عالراس
للمشرعه گومن نروح العباس
بدمعتها نادت خويه يابو النوماس
فرجه غدينه بلا خدر للارجاس
      وتومي عليه.... انذال اميه
جارت علينه الايام.... جبت الحرم والايتام
            للطف رجعنه
                  **
زينب تنوح اعله الگبر اسمعها
تشجي هضمها ودم يكتم دمعها
فگدك وفگد حسينها الفاجعها
للوطن گوم احدي الضعن رجعها
       فراگك هدمها....زيدهضمها
ماتت جميع الاحلام....جبت الحرم والايتام
               للطف رجعنه
                **      **
خادم اهل البيت
ابو احسان الهلالي