الثوره الحسينيه
**
زين اتامل زين...... منه شراد حسين
راد اصلاح لهاي الامه....خط المنهج النه بدمه
زين اتامل زين
**
خل نفكر زين ندرس ثورة حسين الابيه
ابد مارايد مناصب لا كراسي ابن الزجيه
بثورته الاصلاح ينشد ضد فساد ابن الدعيه
اهداف للثوره رسم.....والواجب عليه انحتم
من شاف دين الله انهدم....وظلم زاد اعله الرعيه
عالظالم من ثار....راد انصير احرار
واتعنه الطف بكل همه....خط المنهج النه بدمه
زين اتامل زين
**
حسين موبس عبره رايد منه ناخذ كون عبره
كون عالحق مانجامل وضح بهل ثوره فكره
احرار راد النه نعيش ونعلن اعله الظلم ثوره
ياعالم انشوف العجب...عالظلم ساكت هالشعب
وخير الوطن كله انهب.....والشعب ثلثينه فقره
ماتصحه من النوم ....ياشعبي المظلوم
خل تتوحد عدنه الكلمه...خط المنهج النه بدمه
زين اتامل زين
**
نشوف مجلسنه النيابي بالفساد اشتهر صيته
اشلون نحمي البيت كلي والحراميه اهل بيته
باكله عمامه ولبسها ويحجي بالدين وقضيته
جذاب خالف للوعد...بس حصل الكرسي وكعد
بس للنهب كام استعد....توضحت اهداف نيته
ياشعبي الجبار .....وجد من تختار
بيدك انته اتزيل الظلمه....خط المنهج النه بدمه
زين اتامل زين
**
من النفاق حسين رايد كلبك اتنظفه يسامع
كون ثابت بالمواقف ابد متغيرك مطامع
تكشف الفاسد تفضحه طايع لامر المراجع
صرخة اللاء بكربله...ضد الفساد وكل هله
مو تكعد انته تجامله....وعنه لاتوكف تدافع
رايد منه افعال.... مارايد اقوال
نرشد كل مايل ونفهمه....خط المنهج النه ابدمه
زين اتامل زين
**
حسين يدري بالجراله واعتنه الكربله ابهمه
وصل ليها وشم تربها بيها طيب العطر شمه
واعداني جدي بيها هالارض صاح ابو اليمه
ناده يشيال العلم
بهاي الارض ابنوا لخيم
بيها الفرض خويه انحتم
يرويها دم اهل الشيم
خط الوعد بيها القلم
ونحي دين الله ورسوله الرايد الطاغي يهدمه
***
خادم اهل البيت
ابو احسان الهلالي