عريس الشهاده

تقرأ شور او نزله من جلوس

......................

عريس الشهاده إمن السمه إتهنه
جاسم زفـته والـــــدم إلـــه حنّه

*********

يوليدي تقدم رملته إتكلمه
أمه إبرگبته إمن إتبوسه وإتشمّه
صارت زفته الليله إبحرب عمه

حاچي أمك يجاسم كلهه وإتمنه
جاسم زفته والدم إله حنه

*********

چنت افرح وأقيس ابطولك اوليدي
مثل شمس الصباح إومبسمك عيدي
وإكبالي إمن أشوفك هذا هو عيدي

وأعيش إبجال جسام وأشوفنه
جاسم زفته والدم إله حنّه

*********

اخذ لامة أبوه اوسيفه إودرعه
بعيونه غضب عباس شيرجعه
من طبع الهواشم إبني أخذ طبعه

چلبت إبقميصه إوردت أرجعنه
جاسم زفته والدم إله حنّه

*********
جاسم من برز چن شكهن غيومه
بدر أربعطعش مامكتمل يومه
ابهلهوله سيوف الزفه للحومه

چن شقة قمر إبني إلولد چنّه
جاسم زفته والدم إله حنّه

*********

خفت اهواي كلش منهدم حيلي
عمود الخيمه من أوكف يتچيلي
ظل دمعي إعله خدي بس يناغيلي

لزمت الباب واتنطر خبر منه
جاسم زفته والدم إله حنّه

*********

كل عريس عدنه اتزفه بس ربعه
وكت الزفه نشعلّه العمر شمعه
هلاهل أمه تتحول إله دمعه

هلهولة  شهاده إتزفه للجنه
جاسم زفته والدم إله حنّه

*********

جابوك ابمحامل يبني ياجاسم
أسويله ابوفاته عرس ابو القاسم
طش دمك زفاف ابين الف صارم

عرس ابني تسولف كربله عنّه
جاسم زفته والدم آله حنّه

*********


الحمدلله رب العالمين

ديوان دموع الهاشميات

الجزء الرابع