ليلة هدعش
** **
ياليل هدعش ليـــل الرزيـه
وشحال العقيله بهل المسيه
****
بكت بس اليتامه والارامل
ترعاها العقيله بدمع هامل
ليلة وحشه هذه الليل قاتل
وشبول الهواشم عالوطيه
*** ***
حبست دمعة العين بجفنها
وسهام النوايب صوبنها
زينب بالصدر اخفت لونها
تجر بالحسره ونتها الخفيه
**** ****
تهود عاليتامه والكلب نار
وحل ليل الكدر والفكر محتار
تصد بالعين بس جيوش الاشرار
كبرت علة الحره الخفيه
*** ****
من يحرس العيله ومنهو الها
عكب عين الهواشم والكفلها
صاحت ياعلي بدمعه التهلها
احضر عيلتك حامي الحميه
*** ***
يبويه بس حرم وايتام بالبر
واشرار ا ل اميه علينه تفتر
ماظل كل خدر عدنه يحيدر
وراس حسين فوك السمهريه
**** ***
لاخيمه البكت بويه التلمنه
وعل الغبره ضحايه كل اهلنه
وسياط ا ل اميه ورمتنه
بلا وليان بارض الغاضريه
*** ****
يمها ام الطفل تنعه اعله ابنها
شالت مهده وتضمه لحضنها
حل وكت الرضاعه ودر لبنه
اوشبت بالكلب نار السريه
*** ***
وتسمع نوح رمله بدمع ساجم
محنيه الظهر تندب يجاسم
عفتني وظل ييمه الفكر هايم
رحت مني وبكيت اصفك بيديه
*** ***
بعد ماهودت عين االيتامه
وصار الليل يسترهه بظلامه
تعنت بت علي لجسم الامامه
هوت فوك الجسد بت الزجيه
*** ***
كلبت جسم ابو اليمه وليها
تقبّل منحره بونها وبجيها
هالقربان شايلته بديـــــها
تقبل منه يارب البريــــه
*** ***
علكنه شموع شلناها بدينه
نواسي زينب الليله الحزينه
ونعزي الزهره والهادي نبينه
حسين النه نهج والنه الهويه
*** ***