مظلومية الزهراء
***** *****
عفتينه واحنه زغار.....يايمه يا يمه
وظلمه علينه الدار.....يايمه يا يمــه
آنه وحسن وحسين.....ننطي الوجه لاوين
يايمه يايمه
*****
يشمعه الچانت اتضوي ليالينه
ياحضن الحنان البيه تدفينه
راحت والمصايب دارت علينه
وبس دمع المحاجر ظل يواسينه
من الضلع والبسمار....يايمه يايمه
حبل الظلم جرار.....يايمه يا يمه
تجري دموع العين ....نطي الوجه لا وين
يايمه يايمه
******
المحسن من وگع يايمه بالعصره
بنبلة حرمله عبد الله حز نحره
بحضن حسين ابوه وعينه اتنظره
عفه صبره ييمه واشحمل صبره
رد بالطفل مذبوح....يايمه يايمه
سابح بدمه سبوح...يايمه يايمه
گلبي انجسم نصين....ننطي الوجه لاوين
يايمه يايمه
*******
لون ما ينكسر ضلعچ يبت طه
ضلوع حسين چا محد تدناها
ولا واحد تجره اعليها مساها
كسر ضلعچ ييمه الهاي جراها
وخيول ابن سفيان ...يايمه يايمه
لعبت عليه ميدان ....يايمه يايمه
لاناصر ولا معين ...ننطي الوجه لاوين
يايمه يايمه
******
تمنيتچ يفاطم عينچ اتنظره
من صابه المثلث طاح من مهره
مرد چبده وتعداه الخرز ظهره
بصبر جراه والدم سال جالعبره
حليه انهدم منه...يايمه يا يمه
منه انگطع ظنه...يايمه يايمه
واظلّمت الكونين...ننطي الوجه لاوين
يايمه يايمه
******
ونفس اللي اشعلو نار الحطب بالباب
علي هجموا ييمه وحرگوا الاطناب
تعالي اشتمي يمه ريحة العطاب
بگت بهدومي لسه والدمع سجاب
بدمعي وصحت عباس...يايمه يايمه
الحگ يبو النوماس...يايمه يايمه
ماضلت صواوين...ننطي الوجه لاوين
يايمه يا يمه
*******
ياصبر التحمله التفگد الوليان
وتنظرهم جثث ظلوا عله التربان
وحرم وايتام هامت كلها بالوديان
واعله العگمي طايح كمر عدنان
من الخدر سلبوني ....يايمه يايمه
ولو صحت ضربوني ...يايمه يايمه
تمنيتچ اتحضرين ...ننطي الوجه لاوين
يايمه يايمه
********

خادم اهل البيت
ابو احسان الهلالي