دمعي عاشرته بانين.......آه يفراك الحسين
**
مشوا عني اودعوني ودمعي عالخد مايجف
واليودع احباب كلبه كلش وداعه كلف
حني حن ام الفصيل عليهم وما يختلف
والعليله وياي ظلت كثر بجروحي النزف
يا اله العالمين....آه يفراك الحسين
**
لو لفت يمي العليله نندب بصوت الحنين
نجري دمعتنه وننادي آه يفراك الحسين
مره اهود عليه مره واحبس بصدري الونين
مره تغلبني دمعتي عالوجن تهمل العين
نندب بصوت الثنين ....آه يفراك الحسين
**
حالته صعبه يسامع من يفاركله حبيب
وانه مامتعوده مره عني ابو اليمه يغيب
طول غيابه عليه وهو للعله طبيب
وبصلاتي ادعوا ربي احفظ ابني يامجيب
بيك ياربي استعين....آه يفراك الحسين
**
حسين روحي وهوعقلي عندي كلشي بالحياة
حسين من طول غيابه ريت يلفيني الممات
خوفي لا ميعود اليه ينذبح بيد الطغاة
الليل بالحسبات اخلصه وياي جم حسبه تبات
والكلب دامي حزين....آه يفراك الحزين
**
كلبي حس بالام كلبي انكسر والله منصدع
من الصبح ناعي المصيبه ينعه صوته مرتفع
جيت يمه من سمعته وتهمل عيون الدمع
اشعندك من اعلوم كلي بصوت تنعه منفجع
كلي عن ابن الامين....آه يفراك الحسين
**
عظم الله اجرج يكلها من عرفها ام البنين
راحوا اولادج يحره ومنهم انحز الوتين
وابو فاضل اخبرنج لا شمال ولا يمين
خسف بدره اعله الشريعه ابد ماضاك المعين
فدوته كل البنين......آه يفراك الحسين
**

خادم اهل البيت
ابو احسان الهلالي

» تاريخ النشر: الثلاثاء 25 / 10 / 2016 - 08:14 مساءً
» تاريخ الحفظ: الإثنين 15 / 06 / 2026 - 11:54 صباحاً
» شبكة الوادي الثقافي