من قاسم التعيين ....اموقع من حسين
من منهج الحشدين ....بالغاضريه
**
آنه شاعروبخيالي عشت وسط الحومه
بفكري كل صوره شفتها لوحه الي مرسومه
شفت شاب 12عمره للحسن وعلومه
يطلب الرخصه وفتحلي نافذه معلومه
ابن الحشد قاسم ....وابن الحسن جاسم
والفارق الحاسم .....بالغاضريه
**
الحومه ياعمي ارد اطبها بكل عزيمه وكل ثبات
ماتهمني حشود اميه وابد ما خاف الممات
بعيني اشوف الحشد عمي يمر نفس النايبات
امسلح ابفكر وعقيده عالسواتر من يبات
عنده عزم واصرار....بالصوله يكطف نار
يحركهم الاشرار....... بالغاضريه
**
كله عمي بعيني شفتك لا ابد ماقصريت
بدمك اتحنيت يبني جيتك عليك انحنيت
وي شباب الحشد حاضر بالنصر الهم دعيت
واليكع مجروح شفته وللشهيد آنه اعتنيت
يوكع بلا جفين ....وتتكطع الرجلين
تصرخ يبو الحسين ....بالغاضريه
**
اعتني العباس عمي وياي والاكبر اريد
ويه الحشد نوكف سويه داعش اندوسه ويزيد
عمي اروحن اخبر امي تعتني لام الشهيد
خلي تنعه وياها تبجي اثنيهن فكدن وحيد
لام الشهيد اتروح ....رمله بكلب مجروح
وياها تون وتنوح.....بالغاضريه
**
عمي ياجاسم تراني مامفاركهم ابد
وفاطمه امي الزجيه وزينب ويانه بعد
وحيدره حاضر وياهم من ينادونه مدد
من ينادي الحشد باسمه الناصبي منه ارتعد
ياعمي وياهم .....لا ماتركناهم
احنه النصرناهم....بالغاضريه
**
الليله نرفعها الايادي بالدعاء بكل خشوع
عجل اللهم عجل للفرج نجري الدموع
للحشد والجيش نظره بجاه مرضوض الضلوع
والحشد جيشك يمهدي بصوت تصرخ هل الجموع
نورك يضوي الكون....منه تكحل عيون
تحت الامر يمشون..... بالغاضريه

خادم اهل البيت
ابو احسان الهلالي

» تاريخ النشر: الثلاثاء 25 / 10 / 2016 - 08:16 مساءً
» تاريخ الحفظ: الإثنين 15 / 06 / 2026 - 11:30 صباحاً
» شبكة الوادي الثقافي