عافوني اومشوا اهلي وجفوني
وماجفـــت دمعــــتي من عيوني
بعيوني صورهم...كل لحظه بذكرهم
**
اسولف ويه روحي ماخذوني ليش
عليله اخلافهم جا شلي بالعيش
ريحتهم دوه من اشتمها افيش
غركة ابحر همي ومالكيت الكيش
اخافن من مشو عني نسوني
احبابي الاودهم ....كل لحظه بذكرهم
**
وياهم روحي راحت والضعن سار
وراهم دمعي رشيته من الاخطار
يجالب فكري بالحسبات محتار
عله فراك الاهل كلبي يشب نار
اظل انطر وعـــــدهم واعدوني
اتنطر خبرهم ....كل ساعه بذكرهم
**
بصفنه الليل اخلصه ودمعة العين
واتخيل صور كل اهلي وحسين
ساروا بالضعن ما ادري لاوين
شما اذكـــــر رقيه يزيد الونين
عليله وما احمل الفركه يدروني
هدمني بعدهم ...كل لحظه بذكرهم
**
مامر الوسن جفني واغمضه
عله فراك الاهل كلبي تشظه
تمر بيه صورهم لحظه لحظه
نحلني الفراك وعظمي رضه
دمع فراكـــــــهم وذر جفوني
عليه من يردهم...كل لحظه بذكرهم
**
اريد ارسل سلامي وي هوه الهاب
لبوي حسين ولعمتي والاطيـــــاب
اشومحــــد اجاني من الاحبـــــاب
زرعة الروح انــــاطر عتبة الباب
بلجـــــن عمي والاكبــــــر يجوني
اشو طول سفرهم....كل لحظه بذكرهم
**
مهد عبد الله خالي لصدري اضمه
يبعــــد الروح ناغيــــني اكلمــــه
اروح لهـــــدم ابوي بلهفه اشمه
آ يحسيــن اصيحــــــن يبو اليمه
ياريحة هلي المنـــــها احرموني
زماني احرمني منهم ...كل لحظه بذكرهم
**
خادم اهل البيت
ابو احسان الهلالي

» تاريخ النشر: الأربعاء 9 / 11 / 2016 - 08:56 مساءً
» تاريخ الحفظ: الإثنين 15 / 06 / 2026 - 03:19 مساءً
» شبكة الوادي الثقافي