ريت راسي اللي انطبر
ياعلي كلبي انفطر
تروح وابقه بلايه ظل
بويه بويه .....بويه بويه
****
ساعة التوديع صعبه ياولينه
من تروح اتطيح خيمتنه علينه
بويه ياشمعة ضوه عيون الحزينه
بالعمر شلي بحياتي وبسنينه
كلش فراكك صعب.....وجرحك بنص الكلب
ينزف ومايندمل
بويه بويه....... بويه بويه
ريت سيف الصوبك بيه صوباني
ومن حنانك ياعلي بويه احرماني
صح فكدت امي وجرحها منه اعاني
لاجن افراكك يبويه الهدماني
الحيل يابويه انهدم.....كمت اعثر بالجدم
فراكك بكلبي يسل
بويه بويه...بويه بويه
حالة التفكد ابوها اشكد اليمه
من بعد عينك صفت زينب يتيمه
ابقه مكسورة الخاطر ياحريمه
بحسرة البويه اظلن يا هضيمه
اليوم صار ويه الامس....دنيه وبلايه شمس
عني لا لا ترتحل
بويه بويه....بويه بويه
من بعد عينك اشاهد جم رزيه
بعيني اشوفنها يحماي الحميه
والمصايب لمن تهودر عليه
ويه ابو اليمه من اطب الغاضريه
المناصر من يشح....سبعطش جرح انجرح
ويفترق بويه الشمل
بويه بويه....بويه بويه
بويه من ايطيح عالشاطي كمرنه
توكع جفوف الوفه بويه وعلمنه
روّه ارض الغاضريه دم زلمنه
وابو اليمه حسين من يروح عنّه
نبكه ايتام وحرم....نار تلهب بالخيم
بويه افكد جم طفل
بويه بويه...بويه بويه
**
امودع بالله وسلامي عله الوديعه
كلها زينب ظلت بحالة مريعه
باجر عليها تمر اكبر فجيعه
تنهدم يافاطمه القلعه المنيعه
من يسلبون الخدر....يضرب متوني الشمر
دم دمع عيني تهمل
بويه بويه....بويه بويه
خادم اهل البيت
ابو احسان الهلالي

» تاريخ النشر: الإثنين 4 / 06 / 2018 - 01:26 مساءً
» تاريخ الحفظ: الأربعاء 10 / 06 / 2026 - 06:39 صباحاً
» شبكة الوادي الثقافي