الشمس غطتها السحب
    دم تهمل عيون المحب
طگ ضلع الكتاب   من دفعوا الباب
******         ******
وصاهـا النبي طــــــه  بالثقلين هـــــل الامـــه
كتاب الله وهـل بيتـــه  اللزمهم ماتزل جدمــه
لاعن الهـــــوه ينــطق  يوحيله الوحي ايكلمـه
والخالف وصيته ابهاي  كافرماله كل رحمـــه
     اشكثر هالموقف صعب
    والجدم زل عن الدرب
انگلبت هالاصحاب   من دفعوا الباب
******           *******
بضعه من النبي طــــــه   ليش الكوم آذوهـــا
الغضبها يغضب الباري  عن الهادي سمعوها
سلبو حگها من عدهـــا   ولدارك تعنــــــوها
وبنار الحقـــــــد ويلاه    باب الدار شبــوها
    والباب دفعوها ابغضب
    وبالصدر بسمار انتصب
والمحسن انصاب   من دفعوا الباب
******         *******
دفــگ دم الصدر ينزف  وضلع الكــــوثر اتهشــم
ويم العتبه محسن طاح  ملفــــــوف بنسيج الــــدم
وقنفـــذ حين مد ايـــده   سطرها الكون صار اظلم
وبسوط النذاله اشلون   فــــــوگ متونهــــا اتوشم
     وجتفوّا علي خير العمل
    يردوه يبايـــــــع للجهل
حارت هالالباب   من دفعوا الباب
******        *******
المصايب صبت عليها  دهرها اعصار صباها
مركز دين رب الكون  تگــــع وتگـوم خلاها
وبجناحه الظلام ايحوم  فــــوگ الراس غطاها
خلاهــــا طريح افراش  ظلت تهـــــل عيناها
     ما چنها بت سيد الرسل
     والجرح لا ما يندمـــــل
منها الچبد ذاب   من دفعوا الباب
*******        ******
دمعها اعله الوجن يرسم  لوحه الكل مآسيهـــا
بــــآه وحسره واللوعات   والدمعه التواسيهـــا
يتوجـــر جمرها الروح   من ظلم الجره اعليها
عله الهادي تون وتنوح   واشتاقــــــت لباريها
نامت عله افراش الاجل  و الروح فاضت بالعجل
والحزن جلباب   من دفعوا الباب
********      *********
طود الصبر هل دمعه  عليها والدليل انعـــــــاب
تحمل كلبه كلي اشلون  من غسلها داحي البــاب
شاف بعينه وشم سياط   والخد والضلع منصاب
شبت ناره وسط الروح  تسعــــتر والجمر لهاب
     وحسين يمه والحسن  
     دمعاتهم سيل المزن
ابهول المصاب    من دفعوا الباب
*****          *******
مثل ما وصته الزهـره   نفّذ حيدره الكـــــــرار
شيّعها ودفنها بليـــــــل   وما خله الگبرها آثار
وهل السر محد ايفسره   بس اليطلب الها الثار
عجل يا الهي الكــــون   خله ايحاسب الاشرار
     يوگف ينادي الفاجره
    ضلع امي منهو الكسره
اليوم الحساب   من دفعوا الباب
*******     *********


        خادم اهل البيت
        ابو احسان الهلالي

» تاريخ النشر: السبت 8 / 02 / 2014 - 10:53 صباحاً
» تاريخ الحفظ: الجمعة 19 / 06 / 2026 - 10:56 صباحاً
» شبكة الوادي الثقافي