يانجمة الليل (العليله)

** **
يانجمة الليل.....دمعاتي اتسيل وياج اسولف قصتي
عافوني اهلي بوحدتي
يانجمة الليل
** **
عافوني وحدي....ودمعي اعله خدي
وانمرد جبدي......من فاركتهم
بحسبات الافكار....اتنطر اخبار
كمت انشد المار....يخبرني عنهم
ليل اليمرني.....ماغمض جفني
والمرض هدني....مشتاكه الهم
من فاركوني...اهلي وجفوني
جنهم نسوني...موجني بتهم
انطر دليلي....لفركة خليلي
شوكي وهيامي ولهفتي....لعودي وعمامي واخوتي
يانجمة الليل
** **
بروحي العليله....يا هم اشيله
دم دمعي اسيله...ينزف دليلي
من ودعتهم....احبابي كلهم
وابعد ضعنهم...هدملي حيلي
شيهود الروح...وكليبي مجروح
لفركاهم اتنوح...احا يليلي
سهرانه اشاهد...يانجمه اناشد
عن الاماجد....بوني وعويلي
هلبت تشوفين ...وين الضعن وين
خبريني ارحمي حالتي...اقسم عليج بغربتي
يانجمة الليل
** ‘‘
سلتني الهموم....خلتني ما كوم
والعله كل يوم ....صارت ثجيله
مشبوحه عيني ...بشوكي وحنيني
طارش يجيني....والهم يزيله
تنزف جروحي ...واحجي ويه روحي
شيبطله نوحي....ودمعي ومسيله
شو طال الغياب...وعيوني عالباب
ماجوني الاحباب....ياكلبي ويله
خوفي من الاقدار....اتحل بالاقمار
بحسباتي اظل وحيرتي...ودمعاتي حفرت وجنتي
يانجمة الليل
** **
ما احمل فراك.....بيه النفس ضاك
من كثر الاشواك ....لشوفة رقيه
وعبد الله مهده....فارغ اصده
ولحيلي هده.....وناري سريه
بجفوفي اضمه...لصدري واشمه
وبلهفه اكلمه ....ماردعليه
ماتطفي ناري....ليلي ونهاري
منهو اليداري ....العله الخفيه
من يدنه حتمي...منهو اللي يمي
خافن اموت بوحدتي ...ولا يمي اهلي وعمتي
يانجمة الليل
** **
ناعي المصيبه ....بصوته ونحيبه
ويعزي طيبه ....باهل الحميه
عاد الضعن عاد...بايتام الامجاد
وي علي السجاد...والهاشميه
ذبحوه الحسين...واهله الميامين
وصحبته الطيبين ....بسيوف اميه
صوته باذاني ...صكني وعماني
سهمه رماني....ردت المنيه
من قبل هالصوت...يلفاني الموت
شلي بحياتي ودنيتي...يامحنه تشبه محنتي
يانجمة الليل
** **


خادم اهل البيت
ابو احسان الهلالي

» تاريخ النشر: السبت 25 / 10 / 2014 - 12:50 صباحاً
» تاريخ الحفظ: الجمعة 19 / 06 / 2026 - 10:55 صباحاً
» شبكة الوادي الثقافي