هالليله وي زينب نواسيها
بنوح ولطم ياشيعي عزيها
ظل عالنهر مطروح واليها
بقلبها الحزين...تنادي ياحسين
**
من سمعت اتكطعّن جفينك
كامت تحشم يالاخو وينك
انكسر ظهره يلولي حسينك
بدمع وانين.....تنادي ياحسين
**
ريت العمد صوبني ابراسي
كبلك يخويه انكطعت انفاسي
يابو المحنّه يا اعز ناسي
اخي يانورعين...تنادي ياحسين
**
ريت السهم لعيوني طفاها
طاحت الخيمه ومنهو يبناها
راح الامل وابتعد رجواها
وركنها الحصين ...تنادي ياحسين
**
راح الخدر من طاح واليها
ونار الخيم منهو اليطفيها
سياط الشمر تشكفها بيديها
آه من السنين ....تنادي ياحسين
**
ريتك يخويه تنظر الحالي
بحبل اليسر مجتوفه يالوالي
جتالك ويه الضعن يبرالي
بصبري استعين...تنادي ياحسين
**
هاي المجالس كلنه نحيّها
نتحده كل الراد يمحيها
ياسيدي خل عينك عليها
بدمع وانين... تنادي ياحسين
**
خادم اهل البيت
ابو احسان الهلالي