للعليله ع**
ياهوه الهاب اخذ مني سلامي
لابو السجاد واخوتي وكل عمامي
من مشه ضعن الاهل ...كثرة عليه العلل
**
بيك اشمن ريحة اهلي ياهوه
بنار فركاهم احس كلبي انجوه
هم يعودون ونرد نكعد سوه وتنجلي الظلمه ويردلينه الضوه
الواعدوني اخافنهم نسوني
الهم وياك اخذ دمعة عيوني
فراكهم بيه اشعمل..... كثرة عليه العلل
**
من تمر اعليهم اشرح حالتي
وسلم اعله حسين ابوي وعمتي
فراكهم هد حيلي كبرة علتي
عكب عين الاهل شلي بدنيتي
كلبي محتام لعبد الله ارد اشمه
وارد اناغيه ولعد صدري اضمه
كلبي بالآه اشتعل.......كثرة عليه العلل
**
بالضعن لمن سروا عني ابعدوا
روحي وياهم مشت ماظن دروا
واعدوني اهلي لاجن ما اجوا
ركد مني الحيل ماظنهم دروا
خوفي الاقدار تحل باهلي النشامه
مساهره الليل اعيشن بالملامه
ياكل بكلبي الوجل ......كثرةعليه العلل
**
ياهوه بدموعي خطيت الكتاب
وي سلامي لاهلي حملته عتاب
راح العرابي وخذه ومارد جواب
وبين حسبات الفكر دللي ذاب
وبصلاتي ادعو لباري اله
سالم ايعود لدياره وهله
والجسم مني نحل...كثرة عليه العلل
**
بيا مكان حسين بضعونه استقر
ياهوه سولفلي واخبرني الخبر
وعله حالي ياهوه ناح الحجر
كلبي طك لشوفة اعزاز النظر
سولف وياي لاتخفي عليه
نار الفراك تره بكلبي سريه
مابقالي كل امل.....كثرة عليه العلل
**
وكأن الهوه جاوب بالعجل
الظنه اكطعيها ولا ضلج امل
بالطفوف حسين مذوح انجتل
وراسه فوك الزان مرفوع انفصل
ماتم عليه نصبت فاطمه
ولوح العرش ناح واهتز السمه
بكربله حل الاجل....كثرة عليه العلل
**
خادم اهل البيت
ابو احسان الهلالي