عمه الحكي طاح اخوچ
*****
السيد هادي الموسوي الناصري
عمه الحكي طاح اخوچ..؟..عمه صيحيله ابوچ
جسمه سجاده عله الكاع انفرش..؟..بالعبي عمه نسويله نعش
عمه الحكي..؟..طاح إخوچ
*******
إتوجهي صوب النجف عمه العلي
مابقه واحد يزينب من هلي
عمه كوليله سهم بي مبتلي
من يسحبه دم جفوفه تنملي
خلي يچي إيجر السهم..؟..رغم مابي من ألم
والرمل بجروحه ماي إوچنه طش ..؟..بالعبي عمه نسويله نعش
عمه الحكي..؟..طاح اخوچ
***********
كتله بويه إوچنه عمه بيّه حس
عمه الحكيله بقه بآخر نفس
خاف يكطع نفسه حافر من فرس
والسهم من طاح بالصدر انغرس
كام ينظر للسمه..؟..چن يحاچي فاطمه
امن العطش عالرمله كل جسمه افترش..؟..بالعبي عمه نسويله نعش
عمه الحكي..؟..طاح أخوچ
********
والدي اتحرك وأظن خايف علينه
مدلي چفه اربع اصابع چفه ادينه
اصبعه الخامس اظنه امسلبينه
چن يكلي ياسَكينه اصبعي وينه
كمت ادوّر بالتراب..؟..مني مامش كل جواب
والحجر بدمومه رش..؟..بالعبي عمه نسويله نعش
عمه الحكي..؟..طاح اخوچ
***********
بس شفت ياعمه مجروحه جبهته
ابطارف ارداني الدمه اليابس مسحته
مس مسحت عيونه چن غافي نظرته
كام يستغفر وأظن عطشان شفته
چن يكول انطيني ماي..؟..لن ضرب سوط ابكفاي
وجه ابوي ارداني مش..؟..بالعبي عمه نسويله نعش
عمه الحكي..؟..طاح أخوچ
************
ضايع ابغيم السهام اوماعرفته
صار گبه امن الحجر واهنا حضرته
واللي اذاني اوقهرني امفطره شفته
امنين اجيب الماي كل دمعي عصرته
صحنه احضر ياعلي..؟..الليله ابنك ينولي
جسمه ذاب إوچنه هش..؟..بالعبي عمه نسويله نعش
عمه الحكي..؟..طاح اخوچ
************
كام يتوچه على سيفه ويكابر
چن اسد مكسور بهمومه الخواطر
كمت افييله بعباتي وعكلي حاير
اشلون يرجع والدي اتحطيه العساكر
بآخر انفاسه يجود..؟..للخيم ماظن يعود
والدي چن صوته جش..؟..بالعبي عمه نسويله نعش
عمه إلحكي..؟..طاح أخوچ
************
الحمدلله رب العالمين
ديوان
دموع الهاشميات
الجزء الرابع