علي حيدر*****
دمعة ايتامك جروح..؟..وكفت ابابك تنوح
علي حيدر..علي حيدر
*****
براسك اشلون..ابن ملجَم من كفر..العروة الوثقى ظفر
(علي حيدر)
يم سجودك..أنشد شلون اقترب..راسك شلون انضرب
(علي حيدر)
تقره الاخلاص..شافك اتسبح أمل..تقره ياخير العمل
(علي حيدر)
موش انت جرح البسمله..؟..ابجرحك نشاهد كربله
ياذخرنه ياذخرنه
*********
من يواسيك..سورة الدهر إومنزله..تنعاك نقطة بسمله
(علي حيدر)
دكو الباب..كوم شد إبمئزرك..وانطي محبس خنصرك
(علي حيدر)
اتفارك احباب..واليفاركله ابو..بعد ميشوف الدفو
(علي حيدر)
والجروح امشرعه..؟..ابراسه چنهن مشرعه
ياذخرنه ياذخرنه
**********
ياإمامه...مثلك إتناغي التراب...ماي والخبزه شراب
(علي حيدر)
هاليتامه..چانت إتلامس اديك..تريدك ومشتاگه ليك
(علي حيدر)
بالسلامه..تدعي جابتلك لبن..إتشرّبك يابا الحسن
(علي حيدر)
راكع وساجد تموت..؟..خلصت عمرك قنوت
ياذخرنه ياذخرنه
*********
ياخليفه..خلص ابعوز العمر..مثلك ايعشكه الفقر
(علي حيدر)
بالثلاثه..طلگت دنيا وزمن..ثوبك إيركعه الحسن
(علي حيدر)
بالمواجع..خلصت كل دنيتك..ناسك إنت أذتّك
(علي حيدر)
بموتك يموت السؤال..؟..يعني فاركنه الدلال
ياذخرنه ياذخرنه
********
هاي الايتام..تدري ماعدها صبر..بس خبزتك تنتظر
(علي حيدر)
بيهم شلون..بعد ماعدهم صديق..اوياهم يسير بطريق
(علي حيدر)
ياوليهم..حضنك اعشوش الحمام..چانت إبسدك تنام
(علي حيدر)
چن حمامك بالصحن..ندبتك يابو الحسن
ياذخرنه ياذخرنه
**********
شنهي بعدك..شحّت ورود الصبر..بالشوارع چم شمر
(علي حيدر)
تدري شيصير..عوز ياخذنه ويروح..نبقه منجم للجروح
(علي حيدر)
بس مدامع..نبقه من بعدك علي..مايظل إلنه ولي
(علي حيدر)
عدنه يمك چم سؤال..؟..يعني فاركنه الدلال
ياذخرنه..ياذخرنه
**********
الحمد لله رب العالمين
ديوان
دموع الهاشميات
الجزء الخامس
#جديد#هادي–الموسوي